Perlur og Svín 2

Mikið var nú gaman að horfa aftur á kvikmyndina Perlur og Svín eftir Óskar Jónasson í kvöld.  Gaman að sjá þjóðfélagsádeilu skrifuð um 1995, þar sem stærsti draumur Íslenskra fjölskyldna var að komast í siglingu um Karabíska hafið og svartir samningar um vodka og Lödur við rússneska sjómenn voru raunveruleiki sumra.  Finnbogi, ein aðal sögu"hetjan" í myndinni gerir fyrst skuldsetta yfirtöku á bakaríi á Grettisgötu og síðan aðra skuldsetta yfirtöku á bílfarmi af hjálpartækjum ástarlífsins - síðan reddar Lísa, klára konan hans, öllu á endanum.

Maður sér alveg fyrir sér beint framhald á þessari mynd: Perlur og Svín 2, þar sem Finnbogi er orðin útrásarvíkingur og gerir enn stærri skuldsettar yfirtökur og lendir í enn meira klúðri þar sem Lísa fer frá honum og hann að lokum kemur Íslandi á hausinn..